Sekeda ari leka main kitai Dayak Iban

Tu baru rumah mua pemanah
Ke reregah udah tembu
Tu baru rumah panjai enggi kitai
Tak begamal libai-libai
Nadai utai agi dipegai udah badu.

O, lapa tak perintik tisau langit burik
Enggi kitai apai tak belik-belik
Baka petik lachau engkarung.

O, lapa kerepau langit ijau
Enggi kitai apai tak menawa liau-liau
Baka likau rimau jelu remaung.

Tak lalu pegari mua penamak
Meh petakang bintang banyak
Ke begamal berak-berak
Baka pantak kuing labung

Nya nadai di tanyaka nuan
Peda nuan pala tanga kitai dia
Nyau lindung ayung repa
Entak suka sabang bekung.

Peda pugu tanju enggi kitai lemai tu
Nyau lindung ayu liu
Alai orang gempuru duduk beugung.

Nya baru tebang batang ambak dabang
Tu baru mulut nyangkut ngading iyang lemambang.
Mua meh penyuma aku tu nelenga
Ka rasa dabung gigi
Nyerumba Linda lemai hari

Tang semadi aku nguluka iyang aku
Anak bujang lemambang Kesuie
Ka nimang sungki asi nyadi
Iya ga aru datai ari
Menoa raya ili


Di munggu tabu tali
Enggau ari tinting Unjam lidi
Ke chemegi tanam tunsang.

Mua meh penyuma aku nelenga
Ka rasa labung landai
Nyerumba Linda sabung lemai
Tang semadi aku ngulukaiyang aku

Anak bujang lemambang Tangga Lulai
Nimang pamping piring rendai
Iya ga baru datai ari menua iya
Di tatai panjai rurus belamantang.

Nya baru terai-terai betanchang ratai
Tu baru mulut kitai nyebut ngerintai tuai.

O, sapa tuai ke dulu dikumbai diambi ngabang
Sapa tuai lama ke dulu ditesa bilang lemambang?

Ni lebih ari semarugah nya orang ti bempu tanah
Nemu bagi iya ke manah
Nemu ke renjan ngelala ke tingkah
Enggau nemu iya betuah alai bumai.

Ni lebih ari Sera Gindi ke tau ngaga ai
Ukai siti mayuh perabeni simpang sungai

Ni lebih ari Sera Gindit ke tau ngaga langit
Agi kelia mua pengemit tang nyau
puas ditari naka pemedai.

Ni lebih ari Sera Gindam ke tau ngaga malam,
kekelam sabung lemai.

Uji kanggau ka Sera Gunting
Ke tau nemuai ngagai gensiring langit kuning
Laban iya ke uchu Aki Lang Menaul Banda
Laban iya ke berindaika
Endu dara Tinchin Temaga.

Nya baru kangau ka tuai nama Begri ke dulu lesi
Laban iya dulu ngajar kitai beguna ka atai babi
Laban iya bebini Endu Dara Manis Muka.

Nya baru mesanka Ngian
Ke terubah ngajar nemu nugal
Laban iya belaki ka Bintang Banyak
Lalu beiparka Bungsu Bintang Tiga.

Bala Pemesai SDNU Pampang Antik maia TGM

Selamat Betemu

Aku meri besai terima kasih ngagai bala ti bisi maca blog tu, tu meh blog ti endor kitai berandau ke pemansang raban bangsa kitai dayak.

Enti bala kita bisi penemu tau ka batang randau ti ulih nyungkak pemansang , kita tau mantai ke penemu kita ngambi ka bisi dipekungsi ka bala kitai. Aku ngarap bendar bala kitai dayak ulih mantai ka penemu ti ngemansang ka penatai pemisi raban bangsa kitai.



Terima Kasih.